佇Word寫POJ（白話字）變四正啊！

come from : 鹭水芗南－闽南语部落

真儕朋友攏怨嘆講，佇咧word寫POJ（白話字），明其hiah-ê字體（字型）啦、輸入法啦，to–á攏總chhiâu kah對同仔對同啊，哪知影寫咧寫咧，暴憑（pō-pîn）變kah oai-ko-chhi̍h-chhoa̍h, li̍h-li̍h-lak-lak。尤其是第8聲的調號，較安怎chhiâu伊著bōe鬥搭；ah第3聲的、第5聲的，猶佫有第7聲的，原仔（oân-á）嘛是無kài聽話，有噹時仔，帽仔（調號）明明拄chiah共伊戴kah好勢好勢，哪知目nih仔時間niâ，soah家己變無去。真正龜怪！所以講，這著word較兩光的所在，講起來，原仔舊症頭啊。儂講“胎帶的”（the-tòa–ê），父母生成的，有噹時仔，真正歹醫治。是講，這歹醫是有較歹醫啦，毋佫，“歹醫”無代表講按呢著”無醫”啊。咱是講，這猶佫有救是毋？Hé當然的！

咱毋管是滯佇中國，抑是台灣，普通電腦安的Microsoft Office攏中文版的（佫分“简体”佮“繁體”）較儕。中文版的word，系統暗認的字體（字型）嘛是中文字體（華文字型）啦。即个中文字體講起來hò·，實在有較歹體，伊攏bōe認得西文字體。POJ算講是羅馬字，屬佇西文字體，莫怪儂bōe認得！

現子時，網路頂懸咧時行的POJ輸入法，差不多攏chiâu用“組合字型”的技術佇咧處理POJ。也著是講，除去一寡較基本的羅馬字母（汝像講a,b,c,e,j…等等），chhun–ê攏是用”字母”佮”調號”落去硬鬥起來的，這比論講，「ā」是「a」（字母）佮「-」（調號）鬥的。按呢鬥來鬥去，運氣較好的，會鬥kah真好勢，真mê-kak；ah nā運氣較歹的，soah鬥一下毋成夠鬼。像第8聲即款有挂調號的，word雖然會認得字母本身，會將字母當做西文，不而過，伊bōe認得調號，sòa落去佫kā調號看做是“中文字符（華文字元）”，按呢一中一西，汝中我西，當然無法度鬥做一下，任chhiâu to̍h bōe搭密（tah-bā），按怎看to̍h感覺礙瘧（gāi-gio̍h）。

儂講“囥酒會芳，囥病會重”，有病總是愛醫，有問題總是愛解決。Kah nā是戇的，咱著毋通kā看做是巧的。對付戇儂，著bōe使佮伊講傷儕理路，愛用騙的，術的，按呢緊佫有效。對咱來講，word著是戇的。中文版的word，bōe認得西文字符，咱著愛佇“輸入語言欄”hia加布置一款西文語系出來。汝會使揀德國語的、法國語的、西班牙語的，橫直毋通揀著中文的著會使得。了後，將”POJ輸入法”安滯咱所揀的hit款西文語言的下底。這道理bōe輸講，咱即陣咧kā word交代講咱的”POJ輸入法”是西文語言的輸入法，毋是中文的輸入法。按呢word伊著會真配合，bōe佫 濫sám來。

照即个步數去chhiâu，佫來去word拍白話字，著無問題啊，保證汝的POJ會“寫”kah加真四正，加真súi氣。