轉自阮良皓的網誌
http://kr.blog.yahoo.com/sangjun_1983/1139.html
Ging-dáng â̤-dáu nguāi kó̤ né̤ṳ sèng-hâu tieng gó iā gè̤, ciōng hiēu gáu nguāi ching-chiāng, tieng cêu áng giâ lì lāu, hùng iā gāu iā gāu, lài-gung kuang-kuang giéu, nguāi cūng ging-dáng buáng-buo gì huô â̤ dâung iā duâi.
Mâing-mâing lióh, tieng muōng áng muōng áng, hung iâ biéng iā táu. Diē hâ kī, tàu-tàu chók dáe̤k dioh ging-dáng cī táu gì hung... tù buk gáu lâng cèng hī gèng, eng diô dong mò̤ diō bóng-só̤ gì bóng-só̤-tē̤ng du chui pui gŏ̤, muāng-sé-sié du sê tù-hūng, diô dong giàng diô gì nè̤ng chiū dioh dò̤ dáe̤k méng lă̤ ciá â̤ sèng-sāu giàng diô...
Lài-gung muōng duâi siang muōng duâi siang, buo-sì-huô dīng sioh hiók gák-sák ngâing biáng giâ lì. Nguāi dāng ciá hiēu sié-miàng hāu lă̤ ‘buo-sì-huô mâ̤ guó diô’. Nàng-ga iâ ng sê mò̤ dáe̤k guó buo-sì-huô, o̤h ging-dáng buáng-buo cūng-kuāng gì buo-sì-huô cing gì ô gáu duâi. Lài-gung cing chiông cêu dioh nàng-ga tieng-tàu-dīng, iā hiōng iā hiōng, gâe̤ng cá-lè̤ṳ liông, huô hūng-kuāng puák giâ puák giâ, me̤k-ciu ché̤ṳ guó gŏ̤, nâ giéng du sê cūi, mò̤-sioh-lak kung-ké â̤ diō gì ke̤ng-póng, huô biáng gáu chéu lă̤, chéu dīng che̤ng-che̤ng lióh nga̤-nga̤ du puák iō gŏ̤, niōng-niōng hà̤ giâ lì. Ciā sèng-hâu gó āi giàng guó diô gì nè̤ng chia sāng du mò̤-ló̤h-sāi, iā táu gì hung sāng du chui dang-dō̤ huang gŏ̤, nè̤ng giàng diô ng sê huòng tàu mâ̤ uók, sê huòng sāng ciōng nieng câ̤ dâing mâe̤ng hung chui pui gŏ̤ muāng-sié dṳk.
Ciā huô ô dâung sioh hiók ciá sák, ke̤ng-ké dáe̤ng giâ lì, hung dìng gŏ̤, diô dong gì chéu gâe̤ng huô puák lâ niōng-niōng lióh hà̤ giâ lì, nè̤ng mâing mâing lióh dò̤ lă̤ sāng kiū giàng chók lì lāu.
Hùng-nó̤h du diōng gáu màng-tàu gì hī cṳ̄ng bìng-cêng, nâ ô diô gièng gì cūi, lâng lâng gì chà gó tì chiāng nàng-ga, huô ciá sák mò̤ nioh-òng. Nguāi háng-mò̤-sì siōng gáu, Dṳng-guók â-nik gì biéng-gáik sê ng sê iâ cūng-kuāng mē̤ng bó cūng-kuāng dō̤i, sák gŏ̤ sèng-hâi nàng-ga gì seng-uak mò̤ sêu cing-duâi pó̤-huâi gó ô dák gáu iáh-ché̤ṳ nih? |
发表于 2007-7-14 18:24
发表于 2007-7-14 22:14
发表于 2007-7-14 23:49
