我的这一天（汉罗双文）【LEE兄潮语好文系列之一】

出处：http://hi.baidu.com/pagodashadow ... b96ee43c6d9773.html
Lee兄的好文～
Uá ti ché-che̍k-thian
我的这一天
- Kāng-huâ-kok 60 chiu-nîⁿ Kok-khèng-jît
—XXX60周年XX日（垃圾过滤系统）

Tsa-meⁿ-àm ma̍k che̍k-ē siap, tó ná sua-huat tsū u̍t--khṳ̀, mêⁿ-bué m̆-tsai tsò-nî-seⁿ ŏi ka-kī tsáu-ji̍p-khṳ̀ pâng-lăi--kò. Tsôiⁿ-hăng tái-keh --m̆-ôiⁿ, chhi̍p à kim-jît chiàⁿ ŭ-hó hiah--che̍k-jît. Chiâⁿ-tsa̍p-tiám peh tsáu-khí, tsū-sǹg hiá ie-chiah-kut sng-à-tn̆g, sim-chhêng háⁿ-sĭ m̆-khéng thâu-hó, siu-sàu sṳ̆-lí tiâu-tît, kâi nou-kiáⁿ tsū tàⁿ tie̍h chiàu in-a láu-sṳ hun-hù, phuăⁿ i tsò-che̍k-ē thóiⁿ luat-piaⁿ ngî-sek. Hiá thóiⁿ tsū thóiⁿ, tshoh-nâng suà thóu-sí tsōi, kâi-kâi cheng-sîn-thâu â bŏi-mó. Tàⁿ siang-sît, chiá tuā-jît-chí tùi uán chí-în-nâng --lâi-tàⁿ kâi--sĭ kah pâi-hăng tsáu-tsua̍h m̆-tuā-sṳ̄, bô-mih-ŭ tuā--kâi tshok-tŏng. Yit-tit hí-tsūn-soiⁿ uá mn̄g uáⁿ-má kói-huàng-kun kah ou-kha-kun ŭ sím-mih m̆-pêⁿ-iēⁿ, i tàⁿ:"Tshâm-to nō, pêⁿ-iēⁿ ŭ thau-lia̍h koi li." hí-ē-mue̍h uá háⁿ tó siĕⁿ-tàⁿ a-má tàⁿ--kâi kâi sĭ a mĭ...
昨冥暗目蜀下涩，倒 ná 沙发就兀去，冥尾毋知作麽生会家己走入去房里块。前项歹格毋闲， chhi̍p 到今日正有好歇蜀日。成十点 peh 早起，就算 hiá 腰脊骨酸到断，心情 háⁿ 是毋 khéng 头好，收扫伺理调直，个孥囝就订着照 in 阿老师吩咐，伴伊做蜀下看阅兵仪式。Hiá 看就看，簇侬suà 土死济，个个精神头亦毋会毋好。订真实，者大日子对阮只 în 侬来订其是合排项走绝毋大事，无乜有大其触动。忆得许阵先我问我阿嬷解放军合乌骹军有甚乜毋平样，伊订：“差毋多哪，平样有偷掠鸡而。” 许下物我 háⁿ 在想订阿嬷订其其是抑毋是……

Kah lău-phuâ-bóu-kiáⁿ thóiⁿ-ŭ --che̍k-tsăm ău, tsò uá jiân-tǹg lău-nôu pêⁿ-iēⁿ, ka-kī tó-pàng sài-pêⁿ thóiⁿ-thiⁿ. Kim-jît thiⁿ-sî kuè-hó, liâng-li liâng-li, kú-â-tuh hûn hâu-sṳ̂-hâu-sṳ̂ ná thiⁿ-téng-thâu sŏ-a-sŏ, kuè-kú m̆-pat thóiⁿ-tie̍h chiè lâm kâi thiⁿ --liáu. Yit-tit hí--ē tó lăi--kò meⁿ-àm-thâu tshṳ niáⁿ tsháu-chhie̍h u̍t ná sài-pêⁿ--kò tsū thóiⁿ ŭ kàu-tuā-ē chheⁿ, chí--ē, bô-sṳ̄ ha̍h nou-kiáⁿ tsò-pû lo̍h-khṳ̀ hui-thit-thô â hán-tit thóiⁿ-ŏi-tie̍h chheⁿ ā tit. Chí-kúi-nîⁿ kńg-chiu sĭ-tàⁿ sì-chiu-ûi-tńg iáu chheng-khih-sièⁿ --kò-kiáⁿ, kâi thiⁿ to háⁿ-sĭ tsong-jît hìm-hûn.
合老婆母囝看有蜀暂后，做我然当老奴平样，家己倒放晒棚看天。今日天时过好，凉离凉离，几个 tuh 云 hâu-sṳ̂-hâu-sṳ̂ ná 天顶头 sŏ 啊 sŏ，过久毋别看着 chiè 蓝其天了。忆得许下在里块冥暗头摅领草席兀 ná 晒棚块就看有够大下星，只下，无事合孥囝作陪落去迴 thit-thô 亦罕得看会着星啊得。只几年广州是订四周围转愈清气相块囝，个天都 háⁿ 是终日荫云。

Jît thàu tàu, tiăn-sī bô tī-kâi hó-thóiⁿ, pĕ-jī-bó-kiáⁿ chia̍h-pá tsū tsn̂g-kâi tsáu-khṳ̀ tshuē-u̍t, káu-siâⁿ sĭ chí-tńg khah-kuè he̍k, uá che̍k-u̍t suà u̍t à haⁿ-hun --khṳ̀.
日透昼，电视无底个好看，父二母囝食饱就全个走去 tshuē 兀，九成是只转 khah 过 he̍k，我蜀兀 suà 兀到 haⁿ 昏去。

Chia̍h-pá mêⁿ-hng-thâu-tǹg, siĕⁿ-tie̍h kâi thâu tǹg-kuè phòng-mô-sai pêⁿ-hō, chhēng kâi tuā-tsúi khòu-kue̍h, lap sang ngiat-ôi, khui chiah lok-khok mo-thoh-chhia, lái-khṳ̀ thì-thâu-phòu liê/lieh-tsôi --ē. Tó lōu khṳh chiah mô-̤tá chhiéⁿ-tău, mue̍h-liáu tiām khui m̆ chìn-tsat, sim-lăi pek à hué... "Hiá niáⁿ-î a. Uá chí-muáⁿ suà tie̍h niēⁿ lṳ́ chiá lah-sap mô-̤tá." siĕⁿ-tît ka-kī sim-lăi àm-chĕⁿ chhiè, m̆-tsai tshoh siáu-chhia khṳh mo-thoh-chhia chhiĕⁿ-tău --hí-ē ŭ-bô chiè-seⁿ siĕⁿ?
食饱冥昏头顿，想着个头当过肨毛狮平号，chhēng 个大嘴裤橛，拉双齧鞋，开只 lok-khok 摩托车，来去剃头铺撩齐下。在路乞只摩打抢道，物了憺开毋进节，心里愊过火……“Hiá 恁阿姨啊。我只满 suà 着让汝者垃圾摩打。” 想直家己心里暗静笑，毋知簇小车乞摩托车抢道许下有无 chiè 生想？

Ta̍h-ji̍p koiⁿ huat-lâng, tsū-ŭ muē-kiáⁿ lâi chie-hou sói-thâu, uá tó siĕⁿ-tàⁿ tshṳ̀-tshṳ̀-zû-sĭ, in tsū bŏi siĕⁿ-tàⁿ ka-mô tît chiàⁿ lâi sói-thâu, chiè-seⁿ mo hó séⁿ tshoh tsúi kah kang-la̍t... Che̍k khai-sṳ́ sói, a-muē-kiáⁿ tsū mn̄g-lâi-mn̄g-khṳ̀, àiⁿ sói tī-iēⁿ sói-thâu-ko... tsò tī-iēⁿ thàu-tshan... jiân-tǹg chîⁿ hiè kōi-thàn --hiè-seⁿ. Mài, mài, mài, lóng-tsóng ēng siăng-phóu-thong --kâi tsū hó. A-muĕ thiaⁿ-tît khai-tǹg mêⁿ-hng chia̍h bô kàu, sói-sói sîm-sîm, chhiáⁿ-hiah chhiáⁿ-sói, la̍t-thâu háⁿ su-kuè uán tsáu-kiáⁿ-nî. Suàn, sói-tît chiat-sî tshuē-tsò thì-thâu sai-pĕ lṳ̀ îⁿ-thâu-nn̆g --hó.
踏入间发廊，就有妹囝来招呼洗头，我在想订次次如是，in 就毋会想订铰毛直正来洗头，chiè 生么就好省簇水合工力…… 蜀开始洗，阿妹囝就问来问去，爱洗底样洗头膏……爱洗底样套餐…… 然当钱 hiè 易趁 hiè 生。毋爱，毋爱，毋爱，拢总用上普通其就好。阿妹听直偕当冥昏食无够，洗洗愖愖，且歇且洗，力头 háⁿ 输过阮诸母囝妮。算，洗直即时 tshuē 做剃头师父 lṳ̀ 圆头卵好。

Tò-tńg kàu lăi àiⁿ-boh tsa̍p-jī-tiám, sói-e̍k tît thóiⁿ tie̍h tiăn-sī lăi-tói tó phue̍h tshoh piaⁿ-phí kâi "Uá ti kok-khèng ché-che̍k-thian", uá siĕⁿ-siĕⁿ ia̍h lia̍h kim-jît chí-tshoh-kâi sín-siá --lo̍h-lâi.
倒转到里爱卜十二点，洗浴直看着电视里底在 phue̍h 兵痞其 “我的国庆这一天”，我想想亦掠今日只簇个写写落来。

【用词解释】
1．作麽生，义为“为何”，亦可省为“作麽”或单用“作”，此处取旧时近音表示，可能并非本字。
2．项，义为“某一时间段”。
3．歹格，义为“极其、非常”。
4．乌骹军，解放前警察的蔑称。
5．老奴，义为“老顽童”。
6． hâu-sṳ̂-hâu-sṳ̂，义为“悠哉游哉”。
7．日透昼，义为“将近中午”。
8． haⁿ昏，义为“将近黄昏”。
9． mô-̤tá，外语译音，分割符号暂时用于表示均读本调，义为“改装或带有马达的自行车”。
10.  只满，义为“这回，现在”。
11.  偕当，然当，当过，然过，义均为“好像”。
12.  愖愖，义为“不速，思虑”，暂取自“《后汉•冯衍显志赋》:意斟愖而不澹”。
13.  háⁿ，用同“还”，疑来源于旧时“huân-liáu”一词。
14.  爱卜，义为“将近”，“卜”字取自《荔镜记》中俗写方言字。
15.  写写（sín-siá），第一音为叠音变韵。
16.  亦（â/ia̍h），实际口语中还有多种读音，多数人选择写“也”，但两字均不切合各种舒声读法，仅“亦”能切合入声读法，故此处暂取该字。
17.  暂（tsăm），义为“某一片断”，暂取此字，可能并非本字。

Tshṳ̂-pui Avalokiteśvara Phŏ-sat pó-hō tshuân-ke-nâng jît-jît phêng-an!
蹉跎莫遣韶光老人生唯有讀書好學須靜也才須學也

--------------------------------------------
潮州话八调代表字：
1胎tho 2讨thó 3退thò 4托thoh
5逃tô 6在tŏ 7袋tō 8夺tôh
潮罗特殊变体：[ɯ]=ṳ=ur；[ã]=aⁿ=an；
[aʔ8]=âh=a̍h；[ts]=ts=ch；[tsʰ]=tsh=chh