【视频】闽南语正字故事《阿狗仔游鲤城》惠北腔(泉港腔)】

原创闽南语文学作品正字唸读视频
http://www.tudou.com/programs/view/4Dn6AhNPqJg/#

作者：郭可为  呼唸：郭可为  腔：惠北(泉港)海口腔佮头北话交集融合腔

今仔，咱欲讲其是清朝尾其时节伫泉州府惠安县其惠北(就是现时其泉港)，有蜀个侬名号作“阿狗仔”。伊自我感觉野好，定定认为家已是上通天文，下知地理，无所不知！伊长说：「我会晓兮别侬无一会晓，抑若我未晓兮别侬嘛一定袂晓！」事实是伊定定爱袂晓假会晓啦。伊佫够爱写诗，毋佫写出来其计是歪诗，不过，伊毋是安尔看兮，伊认为家已写其诗野㜅！一流兮！

有蜀工，阿狗仔佮伊蜀个好朋友也是伊其厝边兜，两个相迣去鲤城佚陶。阿狗仔远远看着泉州府有名其彼两座开元寺东西塔，真正是诗兴大发啦！头摇摇辗辗咧灵感就来喽，蜀桗歪诗就置伊腹内生出来喽，现呼唸：

      远看古塔乌~乌乌~，
      顶悬细箍(啊)下底大箍！
(抑)若有蜀工反~过来，
(哼哼)顶悬大箍(啊)下骹细箍。

厝边兜听了笑半工，说：“汝写啥卵鸟诗呀！害我笑仔腹肚计疼矣。”阿狗仔应：“汝佫笑我喽乎！汝知蜀个啥？有落句就是好诗！”厝边兜说：“汝逐摆写其诗，我怎安看怎仔听计嘛亲像歪诗尔。”阿狗仔无爽，应伊：“我佮汝讲，汝后过若敢佫笑我写其诗，我会叫阮厝内迄隻大狗齩汝！”厝边兜听了喙尾细声咬蜀句：“哼，侬「程咬金」至少嘛有三招，汝哦，但会晓蜀招放狗齩侬尔尔。”阿狗仔听了佫无畅喽，伊说：“汝喙若敢佫鸟牙，等齐我会攑针佫汝紩起来!”厝边兜听了喙笑笑说：“好啦阿狗仔，我佮汝讲笑兮，汝毋通激气，乎。”两个好朋友随佫欢喜喙笑蜀路相迣辗街喽。

辗仔辗，辗到塗门街，看着清净寺边头围蜀大阵侬毋知伫遐创啥？亻因计爱看闹热，现到骹兜看着蜀个礁甫伫遐捍蜀部机器。即把机器下底是蜀个铁架，铁架顶面下蜀个柴箱，啊者个柴箱野奇怪会伸长佫会变短；箱仔头前伸蜀箍铜管出来，铜管内面安蜀凷玻璃；箱仔顶佫有蜀支铁支，铁支顶悬有蜀个“铁碗”。阿狗仔看着即架机器毋知是啥碗糕兮，心内暗想“亻因母兮！今仔，煞拄着恁父毋捌其物件喽！”毋佫伊歹势问侬彼是啥物。有蜀股红毛番仔，是蜀个胡鬍礁甫，头毛红金红金目睭蓝蓝，徛伫机器边头佮遐个捍机器其侬说话，叽咕叽咕讲仔醪醪计是西洋话，看势是伫遐教遐个捍机器其侬怎安捍机器。啊遐个学捍机器其礁甫侬，蜀葩虫尾仔亲像蜀條草索置头壳后一直垂到尻川后，蜀看就知是迄时其中国侬。捍机器其侬叫蜀个礁甫佮蜀个诸姥徛机器头前差不多十步远其所在，捍机器其侬说：“等齐，恁徛较在咧，听我喝‘一二三’喝到‘三’其时节恁就袂使振动喽乎！”彼两个侬亲像蜀对翁姥其款，厾头做齐应：“喺啦！”

绁落去捍机器其礁甫头頕柴箱后面彼蜀空其位处，目睭蜀蕊眯蜀蕊搋看头前，野亲像兵仔拍战开铳开炮瞄准其姿势。啊伊喙喝“一、二、三”喝到“三”其时节，遐个箱仔伸蜀下勼蜀下生真听着蜀“哱”仔其声势，佫有蜀迣白光置箱仔顶遐个“铁碗”爁蜀下，佫有烟炝出来，众侬鼻着蜀阵野奇怪兮味素，这味素有淡薄亲像臭焦味佫小可仔亲像放炮其味素，毋佫计无仝，横直逐个旧底计毋捌鼻着即种怪味。出啦这代誌看闹热其侬计惊蜀下，有侬说：“我苦！煞爁烁喽！较紧走喔！无等齐雷若霆敲着会死兮症！”佫有侬讲：“夭寿！恁攑铳刣侬是毋！? ” 阿狗仔想“哭猫！这是变啥蠓啊？袂输开大熕！啊恁父徛遮有危险无?”

捍机器其侬说：“逐个毋免惊尔，阮毋是刣侬，是伫遮「翕相」啦。” “啥?「熻伤」？熻着会伤？”有侬听无就安尔应。“看来，我着佮逐个说较清楚咧”捍机器其侬说：“咱原本若欲挃蜀张家已其像，得倩侬画出来，毋佫靠侬画相第大其问题是无论画图其功夫有偌好，画出来其像计佮诚实侬差野济，着无？”“着！着！有影。”有几个侬安尔应。捍机器其侬佫讲：“现时其西洋侬够[敖/力]！发明野加物件，其中有蜀项物件就是今日咱看兮即种机器，啊即种机器阮佮伊号蜀个名号做「翕相机」，用翕相机咱就可以得到佮诚实其侬完全相仝其像！” “有影无？”逐个毋信，“有影！”(者个捍机器其侬咱即马着叫伊「翕相师」喽) 翕相师应：“我摕几张阮用即架翕相机翕出来其像予恁看齐，毋但有侬像佫有厝其风景其像，翕相机是啥物计会做翕兮！”翕相师摕出蜀叠像可能有一二十张分予逐个看闹热其侬看，伊说：“头蜀张就是我其像，逐个看觅。” “[口外]！拙相仝啊！” “袂输照镜乎！”众侬鬥呵咾。“毋佫，怎安是乌白兮，啊煞毋是彩色兮？”有侬发现着无够好势其所在喽，翕相师应：“这哦，即阵其翕相机翕其像计乌白兮，西洋侬说会佫改进，欲挃彩色其得等后摆则有。” “无要紧，安尔嘛袂歹，横直阮真合意！”逐个佫开始呵咾喽。

看到遮厝边兜佮阿狗仔讲：“阿狗仔汝毋是说逐项物件计会晓兮，啊今日拽代誌我看汝稳当未晓乎。” “谁佮汝说我袂晓兮？我佮汝讲我毋但早就知影「熻」相机，我连伊其原理嘛计知咧！”阿狗仔开始“歕风球”喽。“有影无啦？”厝边兜无啥信，“欲怎会无影？！我问汝，汝知毋知影这「熻」相机为甚乜号作「熻相机」毋？”厝边兜摇头，阿狗仔佫讲：“其实啦，「熻」相机「熻」相其原理佮烰番薯差不多啦，所以用其时节有光佫有烟。侬相伫内面熻蜀下，啊蜀臭焦着火相现‘熻’好势。所以即种「熻」相用其物件就号做「熻相机」，啊即字「熻」汝会晓写未？” 厝边兜鹅鹅无应，伊未晓写啦。“是「天时熻」其‘熻’啦。”阿狗仔愈讲愈大阅，怀话计予翕相师听着喽。翕相师佮阿狗仔说：“汝毋通乌白讲！「翕」相机其原理佮烰番薯无縒！”翕相师手指遐个亲像碗其物件说：“恁看着其光佮烟计是者个「闪光灯」内面其两种化学品，「氯酸钾」佮「硫化锑」通电了佮空气中其氧气发生氧化反应其结果。发光是欲将侬照较显咧，安尔效果较好。”翕相师佫讲：“即字「翕」嘛毋是‘辣天熻半死’其‘熻’”“无是佗蜀字？”阿狗仔淡薄小礼细声问。“是无‘火字爿’表示‘合’其遐个‘翕’啦”翕相师应了佫说：“侬阮号者个名偌讲究咧！毋是凊采罔号爽兮！「翕相」「翕相机」即种叫法是我佮几个做齐置西洋留学倒来其、计拍算后过欲用即种机器趁食其同学(泉州其漳州其厦门其计有)，阮几个扣做堆探讨野久则想出来兮。因为侬操作即种机器，啊机器欲得着侬相其时节伊其「暗箱」，就是者个会伸会勼其箱仔伊会‘合蜀下’，做蜀下‘合’其动作。佫蜀点，若几个侬做齐靠即种机器得着侬相安尔会做说是「合影」。啊这两條计佮「合」有关。阮上早想出来其是‘合相’‘合相机’，毋佫感觉无味无素，就换蜀种说法表示‘合’，安尔就想着‘翕’即字喽。‘翕’伫中国历史上其头蜀卷字典也就是秦汉时期其《尔雅》内面是安尔解释：‘翕，合也。’安尔阮合意其名就出来喽，「翕相、翕相机」。”阿狗仔听甲喙戽戽，听着厝边兜呵咾说：“㜅！㜅！这名够文雅！”伊则回神鬥呵咾：“水！好名！恁够[敖/力]号名”翕相师说：“绁落去我佮阮怀同学会伫泉州漳州厦门开蜀种专门佮侬翕相其店，号做「翕相馆」，到时欢迎恁来翕相！”“好啊！啊阮通叫汝「翕相师」毋？”阿狗仔问。翕相师应：“会做，趁今日我伫遮练习翕相其技术，我可以毋收钱佮恁翕蜀张，等我其翕相馆蜀开张就欲开始收钱喽。”阿狗仔佮厝边兜听了欢喜仔欲死矣，徛相排予翕相师翕蜀张亻因即世侬其头蜀张像。

即个故事自头到尾皆虚构兮
创作时间：西元2011年8月27号10月2号5号

注1：本文所用其腔毋是惠北(泉港)其「半南北话」，「半南北话」是惠北海口腔佮惠北头北话其【并集】融合腔，本文其腔是惠北海口腔佮惠北头北话其【交集】融合腔。「半南北话」是固定腔，本文其腔是临时腔。惠北海口腔伫惠北(泉港)习惯其叫法是「南話」。
注2：文中其“袂”= [勿会]，“未”=“未”。
注3：惠北(泉港)佮惠安部分位处其“生真”意思佮普通话其“突然”相仝
注4：“落句”其意思是“押韵”
注5：惠北话(泉港话)其“小礼”意思相当于普通话其“害羞、害臊”
      福州话漳州话潮州话嘛有讲“小礼”
      例句1：汝安尔我会小礼啦（翻译作普通话：你这样我会害羞啦）
      例句2：汝袂晓小礼！（翻译作普通话：你不懂得害臊）
注6：“阿狗仔”其声音是用我其声音做蜀个小三度其降调处理得来兮
注7：开头曲仔：陈丽娟唱其「南音」《遥望情君》(经过软件做提速四点几倍其处理调无变)
注8：煞尾曲仔：法国电子组合Daft Punk为电影《TRON Legacy》做其仝名配乐
注9：创视频所用图仔皆网路顶摕来兮

[ 本帖最後由泉州音乐人於 2011-12-31 23:00 編輯 ]

鴻雁於飛

管理員