【视频】闽南语正字日志《幸福太易》

闽南语正字日志《幸福太易》视频

http://www.tudou.com/v/Vnrsm9MiMNg/&resourceId=0_04_05_99/v.swf

作者：鲤城油麻菜籽   唸读：油麻菜籽   腔：泉州城府海口滥

真正佮汝熟似是伫帝爷公遐(泉州关岳庙)。高考煞，阮佮表阿姊去遐还愿，汝嘛有去。我想说有拜有保庇，彼拢是神明赐的缘分，着好好的珍惜。彼日是新历的七月七号。空九年的时阵。想起来嘛过去诚久喽。

七月底，摕着学堂的录取通知书，着去外省读册。

八月起行前，伫飞机顶，我读着一篇文章，《幸福来得太易，人不易珍惜》，啥侬写的，文章是讲啥，我早着[勿会]忆咧喽。但会记咧，即几字字，予我想着咱做一下短短的彼几日。彼时希望说，分开是暂时的，毕业倒来，佳人应犹在。所有的情思，我共伊写做一本日记，写滇就寄去汝的手头。逐暗欲睏之前，我会摕一张纸条仔，伫[辶弄]空的所在做一个记号，记录咱伫无仝所在过去的每一日，然后拗做一粒五角星，入咧玻璃矸仔内。

我捌说着，我无爱讲电话，有话请汝写批予我。毋知是毋是嫌我伤土抑是酵，汝会逐日拍电话传我，却而罕咧回我的批。到际，桌屉裡彼叠批还四四正正摆咧遐，毋捌佫去振动着，裡面有汝寄来的，嘛有我写了家已囥的。

到今年的热侬，算算咧嘛欲两年喽。听起来若像诚久，毋过真正佮汝见面则无彼几摆尔。两年的变化诚实诚大，[勿会]记咧底时开始畏拗五角星，拗愈济，再会的希望愈细。嘛[勿会]记咧底时开始，毋[勿爱]佫写物件予汝，因为我感觉彼是家己咧加工。但会记咧，对佗一日开始，我无想欲佫听着汝的声说。

千里之外，汝的形影那行那远。一侬一路早着已经注定，只是当时无爱承认尔。


做视频：泉港郭可为
录音：鲤城油麻菜籽
改文：斯文施 limkianhui  痟婆仔
校字：郭可为
曲仔：美国吉他手Marty Friedman其电吉他演奏专辑《Scenes》第5桗 Realm Of The Senses
图仔：网顶摕兮
创作时间：西元2011年12月

very good